11/10/18

AXUDANTES PARA A BIBLIOTREGA

Buscamos axudantes para a Bibliotrega. Se che apetece botar unha man, reunirémonos hoxe xoves 11 de outubro no 2° recreo. Vén informarte sen compromiso. ☺



21/05/18

Exposición das Letras Galegas

A semana pasada tiveron lugar na Sangriña varias exposicións para conmemorar o Día das Letras Galegas.

Así, puidemos ver na entrada do centro dez láminas elaboradas polo IES Torrente Ballester para celebrar as nosas letras, que fan un repaso á traxectoria vital e literaria de María Victoria Moreno.

Ademais, na entrada da Bibliotrega colocáronse tamén diferentes diapositivas coa biografía e obra da autora; así como algúns dos seus libros máis destacados, para consulta de toda a comunidade educativa.




23/04/18

Actividades polo Día do Libro





Esta semana terán lugar unha chea de actividades na Bibliotrega para conmemorar o Día do Libro; para facer que a literatura chegue a todas e a todos, para desfrutala, vivila e compartila.

Este luns 23 tivo lugar o contacontos co alumnado do CEIP A Sangriña e o noso alumnado de 1º da ESO A e 3º C e D. Os máis cativos e cativas contaron unha historia inventada e deseñada por eles Nadarín, e despois realizaron actividades en equipo da temática central do conto: o mar.

Esta mesma tarde teremos a segunda das actividades. A presentación de Elefantes de papel de María Salinas e Berto Pirata. Estará destinada ao alumnado de 3º da ESO A, B e C, e contaremos coa presenza da autora, para compartir reflexións e ler algúns dos relatos máis destacados.

O próximo venres teremos no vestíbulo un mercado de libros. Todos eles son produto de doazóns realizadas por diferentes centros escolares e particulares, e serán vendidos por 1€, en aberto para toda a comunidade educativa. Toda a recadación acadada nese día destinarase a un fin social, á asociación Paleng Children's Centre, que busca a promoción da lectura en países subdesenvolvidos.



20/04/18

Charla-Obradoiro de linguaxe de signos na Bibliotrega

Na mañá de onte tivo lugar na Bibliotrega unha actividade para o alumnado de 1º de Bacharelato sobre linguaxe de signos, organizada polo Departamento de Lingua Castelá e Literatura no marco do proxecto de Linguas Alternativas. Con este grupo de actividades procúrase a reflexión e o coñecemento dos diferentes tipos de linguaxes presentes no mundo, desde a linguaxe de signos, coma neste caso, á lectoescritura fácil e os pictogramas.

A actividade foi impartida pola profesora do Centro San Xerome Andrea Olivares.




26/02/18

Homenaxe a Forges



Antonio Fraguas 'Forges' morreu o pasado 22 de febreiro. A súa figura é unha das máis importantes como viñetista na España dos últimos 40 anos. A través dos seus debuxos podemos facer un repaso, sempre irónico, crítico e comprometido, pola situación social, económica e política que nos rodeou nestas xa máis de catro décadas.

Para homenaxear a Forges e contribuír a divulgar a súa obra, empapelaremos o instituto cunha selección das súas viñetas, para que todas e todos poidamos continuar aprendendo coa súa sutileza crítica, co seu sarcasmo.








19/02/18

Actividades polo Día de Rosalía




D'aquelas que cantan as pombas y as frores 
Todos din que teñen alma de muller, 
Pois eu que n'as canto, 
Vir e d'a Paloma, ¡Ay! ¿de que' a terei?

O próximo 24 de febreiro celebramos en toda Galicia o Día de Rosalía, para honrar e homenaxear a nosa poeta nacional, a máis célebre escritora en lingua galega. Temos a sorte, todas as galegas e galegos, de termos unha muller como nai da nosa literatura e como figura central da nosa cultura, a nosa referente no mundo, a que nos visibiliza e nos fai entrar no canon da literatura, da cultura e do feminismo universal.

Así, para lembrar o seu pensamento e a súa figura, realizaremos o próximo venres varias actividades. Nos dous recreos repartiremos flores e libros en lingua galega, cedidos pola Universidade de Vigo, para todas as persoas que se queiran achegar e participar. Ademais, ambientaremos o espazo con poemas musicados da nosa poeta, para contribuír a visibilizar a música en galego e a actualidade do pensamento rosaliano. 

Ademais, no segundo recreo na entrada do instituto leremos o manifesto elaborado nesta ocasión pola poeta María Reimóndez. As persoas encargadas desta lectura son todas voluntarias do Equipo de Normalización Lingüística do noso instituto.

Finalmente, no panel e no expositor de libros da Biblioteca destacaremos as súas obras máis destacadas, así como a súa biografía e contribución á construción do país.

Todas as actividades desta xornada son organizadas conxuntamente pola Biblioteca, o Equipo de Normalización Lingüística e a Comisión de Igualdade.

Manifesto:

Nun mundo de fiestras pechadas, buscamos o refacho de vento que as abra de vez. Nun mundo que busca facer as comunidades e as persoas máis pequenas, os cartos e a cobiza máis grandes, precisamos forza e profundidade, emoción e pensamento. Ante as fiestras pechadas contra a vida, contra as voces das mulleres, das desprazadas e das nosas outras cómprenos unha palabra firme e abranguente que nos guíe. No bater das fiestras que cheiran a couza do pasado, a mentiras que repetidas mil veces queren chegar a ser verdades, a fala que se nos rouba e aire que nos falta precisamos a bravura das mareas e o salvaxe das montañas. Precisamos todo do que falou e todo o que foi Rosalía de Castro.
Ela é o refacho que busca abrir as nosas fiestras. Un refacho que chega dende o pasado para nos falar do futuro. Un refacho que quere abrir a fiestra para que poidamos navegar. Coa forza das baleas, da que busca novas fillas do mar, da que se ri dos papeis de xénero e nos anima a redefinilos como literatas. Un refacho que trae a voz de todas as meniñas gaiteiras que están por chegar. Un refacho que canta a vida e transforma todo dende as raíces.
Mais para que o refacho entre, precisa da nosa vontade. Pídenos, imperiosa: Abride a fiestra!
E na nosa man está abrir a fiestra. Abrila para vermos a muller, a escritora, a irredutible. A voz que nos une ás rebeldes do mundo, que fascina coa súa luz por onde pasa, que nos ofrece a súa clarividencia para tecermos novas alianzas, a que sempre está do lado da xustiza, do noso lado, a que sempre está aínda por descubrir. Porque en todos os recunchos do mundo, mais sobre todo aquí, en Galicia, hai rosalías que cantan e que falan, alancando con brillantes e destemidas botas azuis entre a lama.
Rosalías que abrimos a fiestra saíndo á rúa contra o espolio da terra que ela cantou, ecolóxica antes de que existise nin o termo. Cada vez que nos negamos a seguir converténdonos en plantación de eucaliptos, minas, xeriátrico e mercadoría, reivindicando a paisaxe que ela utilizou politicamente coma ninguén. Cada vez que pulamos polo público, a sanidade, o transporte, as axudas a quen está na marxe e ela puxo sempre, dende o afecto e a transgresión, no centro. Cada vez que desfacemos o discurso que sustenta a violencia de tantos Pedros mediante a escrita e a acción feminista, contra todos eses que seguen ladrando mentres nosoutras camiñamos.
Abride a fiestra para as viaxes interiores, para a coraxe dos afectos, para sermos das que non temos medo de pensar e de sentir simultaneamente, de recoñecernos mulleres con palabra e voz propia, herdeiras e compañeiras daquela que en cada dedicatoria se recoñecía nas súas iguais.
Abride a fiestra á afouteza e ao abraio, á redefinición do que a historia dos homes fixo de mulleres irreverentes coma ela.
Abride a fiestra porque Rosalia de Castro é o mundo que está por facer. Un mundo que se abre se o abrimos.

María Reimóndez
Asociación de Escritoras e Escritores en Lingua Galega (AELG)

#AbrideAFiestra


29/01/18

Semana da Ilustración!



A Semana da Ilustración comezou o pasado luns 22 de xaneiro coa asistencia á proxección da película de animación Coco dos nosos alumnos e alumnas de 1º/2º de ESO en Vigo. Ao longo da semana tiveron lugar tamén pequenas exposicións en diferentes ubicacións do centro relacionadas con ilustradores, personaxes e distintos libros, co gallo da celebración das seguintes efemérides nas que se pode visibilizar o papel das mulleres de conto:

27 de xaneiro 1832nace Lewis Carol. Realizamos para conmemoralo unha exposición de diferentes edicións de Alicia no país das marabillas.

28 de xaneiro 2002, morte de Astrid Lindgren, autora do libro Pipi Medialongas. Presentase a edición do libro que a editorial Kalandraka vén de publicar en lingua galega.

30 de xaneiro 1886, nace Castelao. Exposición das ilustracións de Castelao.

31 de xaneiroDÍA DA ILUSTRACIÓN. Exposición sobrAna Juan (Premio Nacional de Ilustración 2010), unha das ilustradoras máis recoñecidas a nivel mundial. Amosaremos algúns dos aspectos máis relevantes da súa obra e centrarémonos no seu conto infantil Frida. É unha gran ocasión para facer unha homenaxe a ámbalas dúas artistas. O alumnado de EPVeA de 4º de ESO  está colaborando con esta exposición.


Ademais ao longo de toda a semana o noso alumnado está participando nesta actividade coa creación de diferentes manifestacións artísticas arredor das obras tratadas e a posterior exposición dos seus traballos. 

Finalmente, escolleremos o mellor traballo que recibirá como agasallo unha edición ilustrada de Alicia no Pais das marabillas.

Animádevos a participar!




08/01/18

Cales son as horas de ler no segundo trimestre?

Boas rapaces/zas!

Que tal foron as vacacións? Con enerxía para comezar este segundo trimestre? Veña, a darlle duro!

Nós comezamos este mes de xaneiro publicando a información da Hora de ler para os próximos meses, para que a poidades consultar todos os días que queirades a través do noso blogue e redes sociais.

Ademais, hai uns poucos días anunciouse o Premio Nadal deste ano 2018, que desta volta gañou o barcelonés Alejandro Palomas, coa súa obra Un amor. En breve xa a teremos na nosa Bibliotrega para que poidades consultar e levar para casa, xa iremos avisando! :P





18/12/17

Amplíase o prazo de entrega de libros para o Troco libro...trocas?



Ola rapaces e rapazas!

Ampliamos o prazo de entrega de libros até mañá martes día 19, así que bulide! Todas e todos a traer libros que aínda estades a tempo de participar!

Xa estamos gardando unha chea deles que fostes traendo nestes días e vaites, hai unha moi boa calidade! Aproveitade a participar para poder levar unha destas lecturas no Nadal!