TROCO LIBRO, TROCAS?

Por segundo ano consecutivo, a Bibliotrega xunto co Equipo de Normalización Lingüística do IES A Sangriña, convocan o mercado de intercambio de libros Troco libro, trocas? A partir do luns 3 decembro o alumnado, profesorado e persoal non docente do noso IES pode depositar os seus libros na biblioteca (máximo 2 libros por persoa) e a cambio recibirá unha tarxeta que poderá canxear os días 20 e 21 de decembro no mercado instalado na entrada do instituto. Animádemos todos e todas a participar dando unha segunda vida aos vosos libros e conseguindo novas lecturas para o Nadal. 

Vémonos pola Bibliotrega!

25 DE NOVEMBRO. DÍA INTERNACIONAL CONTRA A VIOLENCIA DE XÉNERO

O pasado 25 de novembro, no aniversario da tortura e asasinato das irmás Mirabel en 1960, todo o mundo conmemora o Día Internacional contra a Violencia de Xénero, que este ano que aínda non rematou xa se cobrou no noso país 45 vítimas mortais.

Dende a Bibliotrega quixemos participar na conmemoración desta data, xunto co equipo de Normalización e Dinamización Lingüística e o de Igualdade e Convivencia, con diversas accións:

- A creación na nosa biblioteca dunha estantería específica de muller e igualdade, onde estarán representadas todas as obras da Bibliotrega que xiren arredor de temas coma a violencia de xénero, a visibilización da muller, a igualdade de dereitos e oportunidades.... Entre outros, podedes atopar títulos coma Todos teriamos que ser feministas, de Chimamanda Ngozi Adichie; Invisibles, de Montse Fajardo; Sabias, de Adela Muñoz Páez; Persépole, de Marjan Satrapi; Aya de Yopougon, de Marguerite Abouet; O corazón da branca de neve, de Francisco Castro.... E moitos máis. Achegádellos a botar un ollo. Asemade, tódolos exemplares destas obras, nos seus respectivos andeis da biblioteca, están marcados cun adhesivo violeta para identificalos facilmente.

- Temos a nosa primeira lista de reprodución en Spotify, no noso perfil Bibliotrega. O nome da lista é Bibliotrega: feminino, plural, e está cheíña de cancións contra a violencia de xénero e a prol da iguadade de dereitos, propostas polo alumnado a través do noso perfil de Instagram @bibliotrega.

- Na entrada da Bibliotrega colocamos un panel con algunhas das lecturas da nosa nova estantería acompañados de citas ou poemas dalgunhas escritores ou mulleres recoñecidas pola súa loita a favor dos dereitos das mulleres.

- Asimesmo, colaboramos na medida do posible coa actividade de lectura do manifesto o 26 de novembro no centro, e coas mesas redondas sobre a violencia de xénero que se realizarán durante a semana.

Moitas grazas a todos e todas os que partipastes na elaboración das lista de reprodución e nas restantes actividades. Esperamos seguir contando coa vosa implicación.

Recordade, para saber o que andamos a argallar seguídenos en Instagram, @bibliotrega, xa estamos a preparar unha nova edición do Troco libro, trocas? Todos e todas atentos/as!

25 DE NOVEMBRO. CONCURSO DE ILUSTRACIÓN

Como sabedes, o 25 de novembro conmemórase o Día Internacional contra a violencia de xénero. Con motivo desta data, a Bibliotrega, o Equipo de Dinamización e Normalización da Lingua Galega e Igualdade e Convivencia do IES A Sangriña convocan de xeito conxunto un concurso de ilustración, co obxectivo de converter os deseños gañadores en adhesivos que se repartirán posteriormente entre toda a comunidade educativa. A continuación deixámosvos as bases deste concurso e animámosvos a todos e todas a participar. 

As bases do concurso serán as seguintes:

1. O concurso está dirixido a todos os alumnos e alumnas do IES A Sangriña, e estará dividido en dúas categorías:

            A. Alumnado de 1º, 2º e 3º da ESO.

            B. Alumnado de 4º da ESO, Bacharelato, ESA e Ciclos            Formativos.

2. Cada alumno ou alumna pode presentar unha ilustración orixinal, en tamaño A4, que inclúa un lema propio ou dalgunha muller ou home coñecidos polo seu activismo a prol da igualdade de mulleres e homes (débese citar ao autor/a da cita, poema, fragmento…). As ilustracións vencedoras serán convertidas en pegatinas, que se repartirán entre a comunidade educativa.

3. O prazo para a presentación de traballos será do 12 ao 21 de novembro. Deberán entregarse ás profesora Beatriz Núñez, María Carneiro ou Gisela González, indicando no dorso da ilustración nome e curso do autor/a.

4. Premios: o gañador ou gañadora de cada unha das categorías recibirá un vale agasallo por valor de 50€ que poderá canxear nunha libraría de A Guarda ou nunha tenda de deportes.

5. Entrega de premios: luns 26 de novembro de 2018 ás 12:00 na Bibliotrega.

SAMAIN NA SANGRIÑA

O pasado mércores 31 de outubro na última sesión da mañán o alumnado de 1° e 2° acudiu á Bibliotrega para gozar dos contos de defuntos de Inacio Vilariño, de Fantoches Baj. Máis info, aquí

.

24 DE OUTUBRO. DÍA DA BIBLIOTECA

O  próximo 24 de outubro conmemoramos o Día da Biblioteca. Esta data foi proposta en 1997 pola asociación de Amigos do Libro Infantil e Xuvenil  co apoio do Ministerio de Cultura, en recordó da destrución da Biblioteca de Saraxevo, incendiada en 1A iniciativa do Día da Biblioteca naceu para trasladarnos a todos e todas nós a importancia da biblioteca como lugar de encontró dos lectores e lectoras de todas as idades coa cultura, e como instrumento de mellora da formación e a convivencia humana.992 durante o conflito dos Balcáns.

Ese mesmo ano de 1992 o músico bosnioherzegovino Vedran Smailovic tocou o seu violonchelo entre os restos da biblioteca, como un acto de resistencia pacífica e unha chamada de atención para o mundo.

Pola súa banda, o historiador croata Mirko D. Grmek, con motivo de este ataque, acuñou o termo  memoricido para definir a destrución da memoria e o tesouro cultural do “outro”, do adversario, do inimigo.

Celebración na Bibliotrega

Para celebrar este día tan especial, a Bibliotrega vai realizar durante toda esta semana unha actividade de Bookcrossing ou solta de libros. Cada día deixaremos unha pista no noso Instagram (@bibliotrega) e nas paredes da Bibliotrega, que vos levarán ata un libro. Indicaremos tamén coa pista a idade aproximada para a que está pensada a lectura en cuestión.  

Gustaríanos moito que unha vez que teñades lido o libro o soltedes de novo. Se queredes podedes mandarnos un MD á nosa conta de Instagram, ou un correo electrónico a bibliotrega@gmail.com  para compartir a ubicación e que así os libros sigan a circular.

Agardamos que participades no xogo e … FELIZ DÍA DA BIBLIOTECA!

AXUDANTES PARA A BIBLIOTREGA

Buscamos axudantes para a Bibliotrega. Se che apetece botar unha man, reunirémonos hoxe xoves 11 de outubro no 2° recreo. Vén informarte sen compromiso. ☺

Exposición das Letras Galegas

A semana pasada tiveron lugar na Sangriña varias exposicións para conmemorar o Día das Letras Galegas.

Así, puidemos ver na entrada do centro dez láminas elaboradas polo IES Torrente Ballester para celebrar as nosas letras, que fan un repaso á traxectoria vital e literaria de María Victoria Moreno.

Ademais, na entrada da Bibliotrega colocáronse tamén diferentes diapositivas coa biografía e obra da autora; así como algúns dos seus libros máis destacados, para consulta de toda a comunidade educativa.

Fotos da Semana do Libro

Velaquí unhas fotiños das actividades da Semana do Libro!

Actividades polo Día do Libro

Esta semana terán lugar unha chea de actividades na Bibliotrega para conmemorar o Día do Libro; para facer que a literatura chegue a todas e a todos, para desfrutala, vivila e compartila.

Este luns 23 tivo lugar o contacontos co alumnado do CEIP A Sangriña e o noso alumnado de 1º da ESO A e 3º C e D. Os máis cativos e cativas contaron unha historia inventada e deseñada por eles Nadarín, e despois realizaron actividades en equipo da temática central do conto: o mar.

Esta mesma tarde teremos a segunda das actividades. A presentación de Elefantes de papel de María Salinas e Berto Pirata. Estará destinada ao alumnado de 3º da ESO A, B e C, e contaremos coa presenza da autora, para compartir reflexións e ler algúns dos relatos máis destacados.

O próximo venres teremos no vestíbulo un mercado de libros. Todos eles son produto de doazóns realizadas por diferentes centros escolares e particulares, e serán vendidos por 1€, en aberto para toda a comunidade educativa. Toda a recadación acadada nese día destinarase a un fin social, á asociación Paleng Children's Centre, que busca a promoción da lectura en países subdesenvolvidos.

Charla-Obradoiro de linguaxe de signos na Bibliotrega

Na mañá de onte tivo lugar na Bibliotrega unha actividade para o alumnado de 1º de Bacharelato sobre linguaxe de signos, organizada polo Departamento de Lingua Castelá e Literatura no marco do proxecto de Linguas Alternativas. Con este grupo de actividades procúrase a reflexión e o coñecemento dos diferentes tipos de linguaxes presentes no mundo, desde a linguaxe de signos, coma neste caso, á lectoescritura fácil e os pictogramas.

A actividade foi impartida pola profesora do Centro San Xerome Andrea Olivares.